Andlýðskrumarinn Tryggvi Þór Hrebertsson til varnar yfirstéttinni og peningafólkinu
Ekkert virðist efla Tryggva Þór þingmann Sjálfstæðisflokksins jafn mikið og hugmyndir um að skattleggja ofurlaun. Það kemur auðvitað lítið á óvart að Tryggvi bregðist svona harkalega við þegar á að ræða hvernig ríkafólkið í landinu gæti komið að enduruppbyggingu landsins. Tryggvi Þór, sem hlítur að teljast með huglausari bloggurum landsins, leyfir ekki athugasemdir við skrif sín svo ég skrifa honum þá bara svar hérna í staðinn.
Tryggvi skrifar í dag annað blogg um ofurlaunamálið þar sem hann gerir að aðalatriði að um 3.500 einstaklingar séu með meira en eina milljón í mánaðarlaun. Tryggi gerir auðvitað enga tilraun til að reikna út hugsanlegar skatttekjur sem fengjust með því að leggja ofurlaunaskatt á þetta fólk en með einföldum margföldunarreikningi má fá út tölur sem hlaupa á tugum milljarða.
Málflutningur Tryggva er ótrúlega máttlaus og sensasjónaliskur þegar hann er skoðaður betur, tölur eins og 3.500 eiga að sannfæra okkur um að tilgangslaust sé að leggja á ofurlaunaskatt vegna þess að 3.500 er ekkert svakalega stór tala. Eins vill Tryggvi ríghalda í tölur sem Ólína Þorvarðardóttir nefndi á blogginu sínu en hefur síðan viðurkennt að væru of háar og talar nú fyrir stig hækkandi ofurlaunaskatti. Munurinn er sá að Ólína er að velta fyrir sér lausnum á meðan Tryggvi er bara á móti og beitir hræðsluáróðri til að drepa niður umræður.
Áhugaleysi Tryggva Þórs og félaga hans í Sjálfstæðisflokknum til að ræða þetta mál heiðarlega er auðvitað engin ráðgáta. Rétt eins og systurflokkurinn í Bandaríkjunum berjast Tryggvi og félagar hatrammri báráttu fyrir hagsmunum sérhagsmunahópa í þjóðfélaginu. Það er ekkert leyndarmál að Sjálfstæðisflokkurinn er flokkur fjármagnseiganda, ofurlaunafólks og annarra yfirstéttarhópa.
